ដោយ:សុខុម
ស្ទឹងត្រែង: ភ្ញៀវទេសចរជនបរទេសនិងខ្មែរទៅទស្សនានិងឈ្វេងយល់ពីសហគមន៍ភ្នំជម្រកសត្វ ស្ថិតក្នុងភូមិឆ្វាំង ឃុំសំអាង ស្រុកថាឡាបរិវ៉ាត់បានជួបការសម្ដែងដ៏ប៉ិនប្រសប់របស់លោកតាចាប៉ីដងវែងម្នាក់លាន់មាត់សរសើរគ្រប់គ្នាក្នុងពេលរាត្រីមួយស្នាក់នៅបោះតង់យប់សម្រាកដំណើរកម្សាន្ត។
លោក ទិត្យ សំហេន ហៅតាចាបុី សព្វថ្ងៃនេះមានវ័យ៨៤ឆ្នាំនិងមានស្រុកកំណើតមកពីស្រុកកំពង់ស្វាយ ខេត្តកំពង់ធំ ធ្លាប់មានប្រពន្ធចំនួន២នាក់។ប្រពន្ធទី ១មានកូនចំនួន១២នាក់តែប្រពន្ធគាត់បានស្លាប់នៅវ័យ៤០ឆ្នាំ។ចំណែកប្រពន្ធទី២សព្វថ្ងៃនេះមានកូនចំនួន១៣នាក់។
លោកតាចាប៉ីបានចាកចេញពីស្រុកមករស់នៅស្រុកថាឡាបរិវ៉ាត់ខេត្តស្ទឹងត្រែងជាយូរឆ្នាំមកហើយ។
លោកបាននិយាយរៀបរាប់ថាកាលពីធំដឹងក្តីធ្លាប់បានសិក្សាជំនាញខាងលេងនិងច្រៀងចាប៉ីនៅទសវត្សរ៍៦០។ចំពោះការហាត់រៀនមិនលំបាកទេសម្រាប់គាត់ដោយសារតែមានដុងពីកំណើតនិងហាត់រៀនបន្តពីគ្រូបន្ថែមទៀតធ្វើឲ្យគាត់ចេះលេងចាប៉ីច្រៀងបានរហូតមកដល់សព្វថ្ងៃនេះ។
បច្ចុប្បន្នពុំសូវមានអ្នកស្គាល់លោកតាទិត្យសំហេនហៅតាចាប៉ីច្រើនទេប៉ុន្តែការសំដែងរបស់គាត់ពិតជាល្អណាស់។ដោយសារគាត់ធ្លាប់ហាត់រៀនតាំងពីជំនាន់លោកព្រឹទ្ធាចារ្យគង់ណៃមកម៉្លេះ។ហើយបច្ចុប្បន្នមករស់នៅក្បែរវត្តមួយក្នុងភូមិឆ្វាំងស្រុកថាឡាបរិវ៉ាត់ខេត្តស្ទឹងត្រែង។
លោកតាបានរៀបរាប់ថា បើទោះបីជាមានវ័យចំណាស់ក៏ពិតមែនគាត់ក៏ធ្លាប់ទៅសម្ដែងនៅទីក្រុងភ្នំពេញផងដែរ។ប៉ុន្តែសម្រាប់អ្នកខេត្តស្ទឹងត្រែងភាគច្រើនពុំសូវបានស្គាល់គាត់ទេ។ពេលខ្លះគាត់ត្រូវបានគេអញ្ជើញឲ្យទៅច្រៀងចាប៉ីក្នុងពិធីផ្សេងៗដើម្បីបានចំណូលខ្លះសម្រាប់ដោះស្រាយជីវភាពក្នុងជីវិតចុងក្រោយ។
តបតាមការអញ្ជើញពីសហគមន៍ភ្នំជម្រកសត្វដើម្បីឲ្យគាត់សម្ដែងច្រៀងចាប៉ីដល់ជនបរទេសនិងភ្ញៀវខ្មែរដែលបោះតង់នៅទីនោះឃើញថាការសម្ដែងច្រៀងទំនុករៀបរាប់ក្បោះក្បាយអត្ថន័យជ្រាលជ្រៅរៀបរាប់ពីសក្តានុពលសហគមន៍ទេសចរណ៍ភ្នំជម្រកសត្វបានយ៉ាងល្អ។នៅក្នុងពិធីជួបជុំនោះក៏មានការអបអរសាទរពីលោកញ៉ែម សារី អភិបាលរងខេត្ត។
លោកសន សារឿន អភិបាលស្រុកថាឡាបរិវ៉ាត់ លោកអ៊ន់ ប៉ោសឿនប្រធានមន្ទីរទេសចរណ៍ខេត្តស្ទឹងត្រែងនិងលោកអភិបាលរងស្រុកឃុំសហគមន៍ស្ងើចសរសើរនិងការសំដែងច្រៀងរៀបរាប់ក្បោះក្បាយប្រកបដោយអត្ថន័យដ៏សែនពីរោះរបស់លោកតាចាប៉ី៕